യുവതി ആത്മഹത്യ ചെയ്ത സംഭവത്തില്‍ പ്രതിയുടെ ജാമ്യാപേക്ഷ കോടതി തള്ളി.
കൊട്ടിയം: നിശ്ചയത്തിന് ശേഷം വരന്‍ വിവാഹത്തില്‍നിന്ന് പിന്മാറിയതിനെ തുടര്‍ന്ന് യുവതി ആത്മഹത്യ ചെയ്ത സംഭവത്തില്‍ അറസ്റ്റിലായി റിമാന്‍ഡില്‍ കഴിയുന്ന പ്രതിയുടെ ജാമ്യാപേക്ഷ കോടതി തള്ളി.
കൊല്ലൂര്‍വിള പള്ളിമുക്ക് ഇക്ബാല്‍ നഗര്‍ സ്വദേശി ഹാരിസിന്റെ ജാമ്യാപേക്ഷയാണ് കൊല്ലം സെഷന്‍സ് കോടതി തള്ളിയത്.
ഇക്കഴിഞ്ഞ സെപ്റ്റംബര്‍ ഏഴിന് അറസ്റ്റിലായ ഇയാള്‍ രണ്ട് മാസമായി റിമാന്‍ഡിലാണ്. കേസന്വേഷണം ഏറ്റെടുത്ത ക്രൈംബ്രാഞ്ചിന്റെ എതിര്‍പ്പിനെ തുടര്‍ന്നാണ് ജാമ്യാപേക്ഷ കോടതി തള്ളിയത്.
ഹാരിസിന്റെ മാതാവിനും സഹോദരനും സഹോദര ഭാര്യയായ സീരിയല്‍ നടിക്കും നിബന്ധനകളോടെ കോടതി മുന്‍കൂര്‍ ജാമ്യം അനുവദിച്ചെങ്കിലും ക്രൈംബ്രാഞ്ച് സംഘം അപ്പീല്‍ സമര്‍പ്പിച്ചതിനെ തുടര്‍ന്ന് ഹൈകോടതി ഇവര്‍ക്ക് നോട്ടീസ് നല്‍കിയിരിക്കുകയാണ്.