മുംബൈക്ക് 9 വിക്കറ്റ് ജയം
ദുബായ്: മുംബൈ ഇന്ത്യന്സ് 9 വിക്കറ്റിന് ഡല്ഹിയെ വീഴ്ത്തി. തുടര്ച്ചയായ നാലാം മത്സരത്തിലും ഡല്ഹി ക്യാപിറ്റല്സിന് തോല്വി. ഇതോടെ ഡല്ഹിയുടെ പ്ലേ ഓഫിനുള്ള കാത്തിരിപ്പ് നീണ്ടു.
ഡല്ഹി ഉയര്ത്തിയ 111 റണ്സ് വിജയലക്ഷ്യം 14.2 ഓവറില് ഒരു വിക്കറ്റ് നഷ്ടത്തില് മുംബൈ മറികടന്നു. അര്ധ സെഞ്ചുറി നേടിയ ഇഷാന് കിഷനാണ് മുംബൈ വിജയം എളുപ്പമാക്കിയത്. 47 പന്തുകള് നേരിട്ട കിഷന് മൂന്നു സിക്സും എട്ട് ഫോറുമടക്കം 72 റണ്സോടെ പുറത്താകാതെ നിന്നു. ആന്റിച്ച് നോര്ട്ജെയെ സിക്സിനു പറത്തിയാണ് ഇഷാന് കിഷന് വിജയ റണ് കുറിച്ചത്. മുംബൈ ബൗളര്മാരുടെ തകര്പ്പന് ഏറിനു മുന്നില് പകച്ച ഡല്ഹിക്ക് 20 ഓവറില് ഒന്പത് വിക്കറ്റിന് 110 റണ്സ് എടുക്കാനേ സാധിച്ചുള്ളൂ. മൂന്നു വിക്കറ്റ് വീതം വീഴ്ത്തിയ ട്രെന്ഡ് ബോള്ട്ടും ജസ്പ്രീത് ബുംറയുമാണ് ഡല്ഹിയെ തകര്ത്തത്.
ഡല്ഹിയുടെ തുടക്കം തകര്ച്ചയോടെയായിരുന്നു. റണ്ണൊന്നുമെടുക്കാത്ത ശിഖര് ധവാന് പുറത്തായി. പൃഥ്വി ഷായും വേഗത്തില് വീണു. ശ്രേയസ് അയ്യരും ഋഷഭ് പന്തും ഒരുമിച്ച് ഡല്ഹിയെ കരകയറ്റുമെന്നു തോന്നിച്ചെങ്കിലും അതുമുണ്ടായില്ല. 35 റണ്സിന്റെ സഖ്യമുണ്ടാക്കിയ ഈ കൂട്ടുകെട്ട് രാഹുല് ചഹര് പൊളിച്ചു. 12-ാം ഓവറില് മാര്കസ് സ്റ്റോയിന്സിനെയും (2) പന്തിനെയും (21) ബുംറ പുറത്താക്കിയതോടെ ഡല്ഹി തകര്ച്ച ഉറപ്പാക്കി.