യു.എ.ഇ അറ്റാഷേയുടെ ഗണ്മാന് ആത്മഹത്യയ്ക്ക് ശ്രമിച്ചു
തിരുവനന്തപുരം: തിരുവനന്തപുരത്ത് നിന്നും കാണാതായ യു.എ.ഇ കോണ്സുലേറ്റിലെ ഗണ്മാന് എസ്.ആര്. ജയഘോഷിനെ കണ്ടെത്തി. വീടിന് പുറകിലുള്ള കാട്ടില് നിന്നാണ് കണ്ടെത്തിയത്. കയ്യിലെ ഞരമ്പ് മുറിച്ച നിലയിലായിരുന്നു ഇയാള്. ആത്മഹത്യക്ക് ശ്രമിച്ചതാണെന്നാണ് സൂചന.
താന് തെറ്റു ചെയ്തിട്ടില്ലെന്നും സ്വര്ണക്കടത്തില് തനിക്കു പങ്കില്ലെന്നും ആശുപത്രിയിലേക്കു കൊണ്ടുപോകുന്ന വഴിയ്ക്ക് ജയഘോഷ് പൊട്ടിക്കരഞ്ഞു കൊണ്ട് മാധ്യമങ്ങള്ക്കു മുമ്ബില് പറഞ്ഞു.
വട്ടിയൂര്ക്കാവില് ഭാര്യയ്ക്കും മക്കള്ക്കും ഒപ്പം താമസിക്കുന്ന ജയ്ഘോഷ് കുടുംബത്തെ വ്യാഴാഴ്ച വൈകിട്ടാണ് കരിമണലിലെ കുടുംബ വീട്ടിലേക്ക് മാറ്റിയത്. കൂടാതെ അനുവദിച്ചിരുന്ന പിസ്റ്റള് ഇയാള് വട്ടിയൂര്ക്കാവ് പൊലീസില് തിരികെ ഏല്പ്പിച്ചിരുന്നു. മൊബൈല് ഫോണ് സ്വിച്ച് ഓഫ് ചെയ്ത നിലയിലായിരുന്നു.സ്വര്ണം പിടിച്ചെടുത്ത ദിവസമടക്കം സ്വപ്ന ജയ്ഘോഷിനെ വിളിച്ചിരുന്നതായി ഫോണ് രേഖകള് കസ്റ്റംസ് കണ്ടെത്തിയിരുന്നു.